Në kuadër të projektit për Rindërtimin e Kadastrit, që po realizohet në bashkëpunim mes Komunës së Vushtrrisë dhe Agjencisë Kadastrale të Kosovës, janë mbajtur dy takimet e para informuese me qytetarët.
Në këto takime morën pjesë kryetari i Komunës së Vushtrrisë, Ferit Idrizi, kryeshefi ekzekutiv i Agjencisë Kadastrale të Kosovës, Avni Ahmeti, dhe drejtori për Gjeodezi, Kadastër dhe Pronë, Remzi Ahmeti.
Me këtë rast, kryetari Idrizi tha se përmes këtij projekti po adresohen dhe zgjidhen çështjet pronësore të qytetarëve vushtrrias.
“Përmes takimeve të frytshme me qytetarë, kemi informuar banorët për alternativat konkrete të ofruara në kuadër të Projektit të Rindërtimit të Kadastrit. 
Ne do të vazhdojmë të punojmë me përkushtim në mbështetje të të drejtave pronësore të secilit qytetar të Vushtrrisë”, deklaroi kryetari Idrizi.
Qëllimi i projektit është harmonizimi i gjendjes faktike në terren me të dhënat në Kadastër, ndërsa të gjitha punët dhe aktivitetet në kuadër të këtij projekti do të kryhen pa pagesë për qytetarët.
