Mbahet Olimpiada e përbashkët Kosovë—Shqipëri në lëndën Gjuhë Shqipe
Sot, në Gjimnazin “Eqrem Çabej”, u zhvillua faza e dytë e Olimpiadës së përbashkët në lëndën e Gjuhës Shqipe për nxënësit e klasave të 9-të në nivel komune, ku nxënësit fitues të fazës së parë sfiduan njëri-tjetrin në këtë garë mjaft domethënëse e me interes kombëtar.
Drejtoria e Arsimit dhe anëtarët e komisioneve u përkujdesën që testi të zhvillohet në mënyrën më të mirë të mundshme. Ky përkushtim siguroi një atmosferë motivuese për të gjithë nxënësit pjesëmarrës. Përveç kësaj, Olimpiada promovon vlerat e gjuhës shqipe si pasuri e kulturës sonë kombëtare, duke nxitur frymën konkurruese, bashkëpunimin mes Kosovës e Shqipërisë dhe për të forcuar kësisoj lidhjet kulturore dhe edukative midis dy vendeve.
Rikujtojmë se përballja tjetër në nivel shteti do të mbahet më 27 mars, ndërsa finalja pritet të zhvillohet në Tiranë në nivel ndërshtetëror më 10 prill, ku ata që janë kualifikuar në fazat e mëparshme si më të mirët e gjuhës shqipe në Kosovë dhe Shqipëri, do të konkurrojnë me njëri-tjetrin për vendin e parë.
Nxënësit i përgëzojmë për sukseset e arritura dhe urojmë të kenë rezultate të larta në fazat e mëpastajme.
