Në fshatin Sfaracak të Vushtrrisë të mërkurën është vënë guri themeltar i objektit të “Qendrës edukuese bujqësore”, objekt ky që pritet të jetë në shërbim të fermerëve të gjithë Kosovës.
Me rastin e vënies së gurtit themeltar, që është bërë nga kryetari i komunës Bajram Mulaku dhe Zenel Bunjaku drejtor i IADK-së, kreu i komunës e ka vlerësuar shumë këtë përpjekje që po bëhet për ti përkrahur profesionalisht fermerët. “Jam i lumtur që kjo qendër e edukimit të fermerëve të gjithë Kosovës po bëhet në territorin e Vushtrrisë që është e njohur për potenciale dhe traditë në prodhimtarinë bujqësore”, ka thënë Mulaku.
Ndërkaq Zenel Bunjaku drejtor i organizatës për zhvillimin e bujqësisë IADK që po implementon këtë projekt, tha se me ndërtimin e këtij objekti që është shembull në Kosovë e ndoshta edhe rajon, fermerët e Kosovës do ta kenë një qendër këshillimore që do të jetë ekskluzivisht në shërbim të tyre. Ai ka bërë të ditur se donator i kësaj qendre është organizata EED nga Gjermania, derisa ndërtimin e saj e ka mbështetur edhe Komuna e Vushtrrisë. “Projekti Qendra Edukuese Bujqësore, financohet nga donatori EED nga Gjermania dhe Komuna e Vushtrrisë, duke mundësuar ndërtimin e një objekti i cili do të jetë në funksion të edukimit, promovimit dhe organizimit të fermerëve në Kosovë përmes trajnimeve e shërbimeve këshillimor”, ka thenë Bunjaku. Ky objekt do ketë 950 metra katror, derisa ndërtimi i tij do të kushtoj 412 500 Euro.
Bunjaku ka bërë të ditur se ky objekt do të jetë edhe promovim i shfrytëzimit të energjisë së pastër solare për ngrohje të objektit, por edhe kursimit të energjisë.
Projekti Qendra Edukuese Bujqësore, financohet nga donatori EED nga Gjermania dhe Komuna e Vushtrrisë, duke mundësuar ndërtimin e një objekti i cili do të jetë në funksion të edukimit, promovimit dhe organizimit të fermerëve në Kosovë përmes trajnimeve e shërbimeve këshillimor
