Nga orët e mëngjesit, zyrtarët e pushtetit lokal bashkë me krerët e shoqatave të dala nga lufta e UÇK-së si dhe familjarët e dëshmorëve e qytetarë të komunës kanë filluar aktivitetet në shënimin e 1 Shtatorit, ditës së dëshmorëve të kombit në komunën e Vushtrrisë. Delegacionet të kryesuara nga nënkryetari i komunës Dibran Përçuku vendosën kurora dhe buqeta lulesh në kompleksin memorial të dëshmorëve të kombit, pranë shtatorës së komandantit legjendar Adem Jashari, në kompleksin memorial të martirëve, në fshatin Pestovë tek përmendorja e Zahir Pajazitit, Edmond Hoxhës e Hakif Zejnullahut për të vazhduar me nderimet në varrezat e dëshmorëve të komunës. Gjatë ditës delegacionet gjithashtu vizituan dhe nderuan me vendosje të kurorave në kompleksin memorial të martirëve në fshatin Studime si dhe në varrezat e Studimës së Ulët të familjes 12 anëtarëshe të Selatin Gërxhaliut. Në orët e mesditës në qendrën e kulturës Hasan Prishtina u mbajt manifestimi qendror kushtuar kësaj dite.
Dita e kthimit të kujtesës për ata që vdiqën me pushkë në dorë në luftën për lirinë e vendit
1 Shtatori është një ditë e veçantë për qytetarët e komunës për të kujtuar të kaluarën jo të largët, atëherë kur vendi ishte i robëruar dhe evokuar peripetitë dhe përjetimet e rënda kur mungonte liria dhe dhunohej dinjiteti, ishin fjalët e para të thëna në emër të kryetarit të komunës Bajram Mulaku nga drejtori i Drejtorisë Komunale të Kulturës Qamil Sahiti në shënimin e 13 vjetorit të ditës së dëshmorëve. “ Është kjo dita që vet e kemi zgjedhur për t’iu kthyer kujtesës për ata djemë e vajza tona, të cilët kanë zënë pushkë me pushkë me armikun për ta mbrojtur popullin dhe tokën e vet ” tha ndër të tjera Sahiti. Veprimtari i kauzës kombëtare Mehmet Hajrizi në këtë manifestim evokoi të kaluarën me plot përpjekje e sakrificë të popullit për të arritur tek liria, gjersa ka folur me epitete të larta për dëshmorët. “ Gjaku i dëshmorëve është jeta, është liria e popullit, është krenaria kombëtare, është kapitali më i shtrenjtë për këtë vend ” tha veprimtari Mehmet Hajrizi. Kryetari i shoqatës së familjeve të dëshmorëve Xhafer Istrefi në këtë përvjetor theksoi: “ Veprimtaria e dëshmorëve duke iu kundërvënë pushtimit dhe represionit, por dhe ndërtuar një vizion të ri të mobilizimit atdhetar ishte dëshmi e përkushtimit të lartë të tyre për lirinë e vendit. Vepra dhe gjaku i dëshmorëve do të mbetet bazamenti i shtetit dhe çështjes kombëtare ” tha Istrefi. Gjatë nderimit në varreza të dëshmorëve merrnin pjesë shumë familjarë të dëshmorëve, zyrtarë e qytetarë të shumtë. Aty ndër të tjerët takojmë edhe nënën e dëshmorit Avni Kutllovci, Sabrijën, e cila tha: “ E kisha djalë të shpirtit, por nuk më dhimbet gjaku i tij, pasi falë tij ne sot jemi të lirë ” tha nëna Sabrije. Gjersa djali i dëshmorit Mehdi Haziri, Behari tha: “ Jam krenar që babai im dha jetën që ne, bijtë e tij por edhe të gjithë Kosovës t’i gëzojmë frytet e lirisë ” tha Haziri. Në fund të programit të Akademisë Përkujtimore u dha edhe një program i begatë artistik, gjersa veçojmë paraqitjen e parë të këngës Amaneti, të kënduar nga këngëtarja e njohur Rovena Stefa dhe mbesa e familjes Jashari Sala Jashari.
Gjaku i dëshmorëve është jeta, është liria e popullit, është krenaria kombëtare, është kapitali më i shtrenjtë për këtë vend, tha veprimtari Mehmet Hajrizi.
Për nder të kësaj dite këngëtaret Rovena Stefa dhe Sala Jashari(mbesa e familjes Jashari) promovuan këngën e tyre Amaneti
