Kryetari i Komunës së Vushtrrisë, Ferit Idrizi, ka bërë të ditur se është nënshkruar marrëveshje bashkëfinancimi me Ministrinë e Zhvillimit Rajonal, për projektin “Rrethoja e Çelikut – Ura e Madhe e Silnicës”.
Me këtë rast, kryetari Idrizi tha se ura do të marrë një pamje moderne, funksionale dhe të sigurt, derisa theksoi se koncepti është frymëzuar nga Ura e Gurit.
“Ura pranë shëtitores “Enver Zymeri” shumë shpejt do të marrë një pamje moderne, funksionale dhe të sigurt, duke e kthyer atë në një pikë të re referimi për qytetin tonë. Ajo që e bën këtë projekt edhe më domethënës është fakti se koncepti i saj arkitektonik është frymëzuar nga Ura e Gurit, një simbol historik i trashëgimisë sonë kulturore, i cili i jep urës së re një dimension emocional dhe identitar.
Duke ndërthurur të kaluarën me standardet bashkëkohore të ndërtimit, kjo urë do të përmbushë nevojat e një qyteti modern, duke garantuar siguri, funksionalitet dhe estetikë urbane për të gjithë qytetarët”, tha kryetari Idrizi.
