Komuna e Vushtrrisë ka shënuar Ditën Kombëtare të Trashëgimisë Kulturore me një panel diskutimi me temën “Trashëgimia kulturore dhe historike e Vushtrrisë”.
Paneli i diskutimit u organizua nën patronazhin e kryetarit të Komunës së Vushtrrisë, Ferit Idrizi, dhe pjesëmarrës ishin studiues, akademikë dhe profesorë nga Universiteti i Prishtinës, të cilët ndanë mendimet e tyre mbi rëndësinë e ruajtjes, studimit dhe promovimit të trashëgimisë së pasur të qytetit tonë.
Hapjen e panelit e bëri kryetari i Komunës së Vushtrrisë, Ferit Idrizi, i cili në fjalën e tij theksoi rëndësinë e ruajtjes dhe promovimit të trashëgimisë kulturore të qytetit.
“Trashëgimia kulturore dhe historike e Vushtrrisë përbën një pasuri të veçantë që na identifikon dhe na dallon si qytet dhe si komb. Vetëm duke e ruajtur trashëgiminë, ne i japim forcë identitetit tonë dhe sigurojmë që historia jonë të mos harrohet,” tha kryetari Idrizi.
Në shenjë vlerësimi për kontributin e tyre profesional në ruajtjen dhe promovimin e trashëgimisë kulturore të Vushtrrisë, kryetari Idrizi ndau mirënjohje për panelistët e këtij diskutimi.
Në këtë panel u paraqitën gjithsej shtatë kumtesa, që në qendër kishin trashëgiminë kulturore dhe historike të Vushtrrisë.
