Sot, në 27-vjetorin e rënies, është përkujtuar jeta dhe vepra e eprorit të lartë të UÇK-së, Heroit të Kosovës, Xhevat Jusufi. Me këtë rast, Kryetari i Komunës së Vushtrrisë, Ferit Idrizi, së bashku me shoqatat e dala nga lufta e UÇK-së dhe familjarë, kanë bërë homazhe dhe kanë vendosur kurora lulesh pranë lapidarit të tij në fshatin Smrekonicë.
Kreu i Komunës vlerësoi lart kontributin dhe veprën e Heroit Xhevat Jusufi për lirinë dhe pavarësinë e Kosovës.
“Sot përkujtuam eprorin e lartë të Ushtrisë Çlirimtare të Kosovës, Xhevat Jusufi, në 27-vjetorin e rënies heroike. Në këtë ditë të shënuar nderuam jetën dhe veprën e Heroit të Kosovës, duke bërë homazhe pranë lapidarit të tij në fshatin Smrekonicë. Xhevat Jusufi është pjesë e historisë së Kosovës, i cili me guxim dhe përkushtim u angazhua për lirinë e vendit. Lavdi dëshmorëve të kombit”, tha kryetari Idrizi.
Xhevat Jusufi ishte komandant për logjistikë i UÇK-së në Zonën Operative të Shalës. Ai u vra më 3 janar 1999, në Smrekonicë të Vushtrrisë.
