Me rastin e 21-vjetorit të themelimit të Muzeut të Vushtrrisë u organizua aktiviteti “21 interpretime të eksponateve muzeale nga nxënësit në 21-vjetorin e Muzeut”.
Ky aktivitet u realizua nga Muzeu i Vushtrrisë dhe Drejtoria për Kulturë, Rini dhe Sport, në bashkëpunim me Shkollën e Mesme të Ulët 2, dhe me mbështetjen e Kryetarit të Komunës, z. Ferit Idrizi.
Në këtë aktivitet me përmbajtje edukative dhe kulturore me nxënës mori pjesë edhe kryetari, Ferit Idrizi, i cili vlerësoi punën e DKRS-së dhe angazhimin profesional të zyrtarëve të Muzeut në pasurimin e fondit të koleksioneve të Muzeut dhe shprehu gatishmërinë për mbështetjen në realizimin e projekteve që synojnë ruajtjen, promovimin dhe prezantimin e trashëgimisë sonë kulturore.
Në anën tjetër udhëheqësja e Muzeut, znj. Shukrane Begu, foli për rrugëtimin dhe sfidat e Muzeut të Vushtrrisë nga themelimi deri më sot, dhe i falënderoi të gjithë për bashkëpunimin dhe mbështetjen në shënimin e 21-vjetorit të tij. Më tutje, znj. Begu ftoi nxënesit që të kontribuojnë në pasurimin e Muzeut përmes dhurimit të eksponateve, me qëllim të zgjerimit të koleksioneve muzeore dhe ruajtjes së trashëgimisë sonë kulturore.
