Dy projekte të reja do të realizohen nga Komuna e Vushtrrisë në bashkëfinancim me Iniciativën për Zhvillimin e Bujqësisë në Kosovë (IADK), të cilat kanë në fokus mbështetjen e grave, burrave dhe të rinjve të Vushtrrisë në fushën e bujqësisë. 
Nënshkrimi i marrëveshjeve për realizimin e dy projekteve është bërë nga kryetari i Komunës së Vushtrrisë, Ferit Idrizi, dhe drejtori i IADK-së, Zenel Bunjaku.
Projektet të cilat do të realizohen janë:
“Fuqizimi i grave, burrave dhe të rinjve që jetojnë në zonat rurale me sfida ekonomike, të krijojnë mjete jetese të qëndrueshme nëpërmjet aktiviteteve bujqësore dhe të përpunimit të ushqimit”
“Përmirësimi i punësimit dhe mundësive për gjenerim të të ardhurave në zonat rurale”
Përmes projektit të parë do të ofrohet përkrahje për gratë dhe burrat në sektorin e bujqësisë, si dhe do të ndahen grante të vogla në sektorin e përpunimit të frutave, perimeve, ëmbëlsirave dhe produkteve të qumështit.
Ndërsa, projekti i dytë synon ngritjen e kapaciteteve profesionale dhe përkrahjen direkte me grante në sektorin e bujqësisë dhe të përpunimit të prodhimeve bujqësore, si dhe mbështetjen e studentëve përmes punës praktike.
“Mbështetja për gratë, burrat dhe të rinjtë në sektorin e bujqësisë do të jetë e vazhdueshme.
”, deklaroi kryetari Idrizi.
