Në 27-vjetorin e rënies së dëshmorit Jeton Tërstena – TOTA, kryetari i Komunës së Vushtrrisë, Ferit Idrizi, bashkë me përfaqësues të shoqatave të dala nga lufta e UÇK-së dhe familjarë të dëshmorit, bënë homazhe dhe vendosën kurora me lule pranë varrit të tij, në varrezat e dëshmorëve në Bletaj, dhe më pas te përmendorja në vendin e rënies, në fshatin Pantinë.
Kryetari Idrizi tha se Jeton Tërstena – TOTA luftoi trimërisht për të sjellë lirinë e Kosovës.
“Sot përkujtuam dëshmorin e parë të Ushtrisë Çlirimtare të Kosovës në Zonën Operative të Shalës, Jeton Tërstena-TOTA, që ra heroikisht në betejë ballë për ballë me armikun, 27 vjet më parë. Dëshmori i kombit luftoi trimërisht deri në momentet e fundit për të sjellë lirinë e Kosovës. Sakrifica e tij do të mbetet gur themeli në historinë tonë të qëndresës dhe frymëzim për brezat që vijnë. Lavdi dëshmorit Jeton Tërstena-TOTA!”, tha kryetari Idrizi.
