Komuna e Vushtrrisë ka mbajtur sot akademi përkujtimore për të shënuar 26 vjetorin e masakrës së Studimes, një nga masakrat më të përgjakshme në Kosovë ku u vranë e u masakruan 116 civil, në mesin e të cilëve fëmijë, gra e pleq.
Akademia u organizua nën patronazhin e kryetarit të Komunës së Vushtrrisë, Ferit Idrizi, i cili në fjalën e tij tha se më 2 maj 1999 forcat serbe pushkatuan mizorisht 116 civilë të pafajshëm nga Vushtrria, vetëm pse ishin shqiptarë.
“Sot përulemi me nderim dhe dhimbje para kujtimit të viktimave të masakrës së 2 majit në Studime, një nga aktet më të rënda të gjenocidit serb ndaj popullit shqiptar gjatë luftës në Kosovë. Në këtë ditë të rëndë, forcat serbe pushkatuan mizorisht 116 civilë të pafajshëm nga Vushtrria. U pushkatuan e u masakruan vetëm pse ishin shqiptarë. Është detyrë morale dhe institucionale që kjo masakër të dokumentohet, të njihet ndërkombëtarisht dhe që kriminelët të dalin para drejtësisë. Lavdi e përjetshme të rënëve të Studimes”, deklaroi kryetari Idrizi.
Në akademinë përkujtimore morën pjesë edhe kryeministri i Kosovës, z.Albin Kurti, kryetari i Aleancës për Ardhmërinë e Kosovës, z.Ramush Haradinaj, deputetë të Kuvendit të Republikës së Kosovës, përfaqësues të institucioneve qendrore e lokale, si dhe përfaqësues të organizatave të dala nga Lufta e UÇK-së.
Më 2 maj të vitit 1999, forcat serbe në fshatin Studime vranë 116 civil shqiptarë, ku nuk u kursyen as fëmijët, gratë e pleqtë.
