Brenda 5 ditësh në territorin e Komunës së Vushtrrisë, Shërbimi i Zjarrfikjes dhe Shpëtimit ka marrë pjesë në fikjen e mbi 60 zjarreve kryesisht malore dhe të qëllimta.
Djegia e hamulloreve, barit të thatë, mbeturinave kontejnerëve, thëngjillit dhe malit janë shkaktarët kryesor të shkaktimit të zjarreve gjatë verës në Komunën e Vushtrrisë. Zjarret e tilla të cilat konsiderohen të jenë të qëllimta shpeshherë po rriten duke rrezikuar të shkaktojnë dëme të mëdha ekonomike por edhe në vet jetën e njeriut. Zjarret gjithashtu po prishin ambientin. Në shërbimin e Zjarrfikjes dhe Shpëtimit thonë që janë të gatshëm në luftën kundër zjarreve “Ne jemi të mobilizuar 24 orë për t’u përballur me zjarret e tilla, kemi pajisje adekuate si dhe staf të specializuar për intervenime” thotë komandanti i këtij shërbimi Gani Isa. Sipas tij ky shërbim krahas ballafaqimit me zjarret, me automjetet që posedon është duke shpërndarë ujë të pijshëm dhe teknik për qytetarët e Komunës. “Për çdo ditë me anë të dy autocisternave shpërndajmë ujë të pijshëm për qytetarët e Vushtrrisë, gjersa me ujë teknik furnizojmë qytetarët në 10 fshatra të komunës” thotë Isa. Ky shërbim numëron një staf prej 31 vetash, nga të cilët 27 janë zjarrfikës. Ai mendon që numri më i madh i zjarreve të verës konsideron të jenë zjarre të qëllimta të shkaktuara nga dora e njeriut duke djegur hamulloret, barin e thatë mbeturinat, djegia e thëngjillit etj. “Vetëm në këto 5 ditët e fundit me ekipet tona kemi marrë pjesë në fikjen e 60 zjarreve kryesisht malore dhe të qëllimta “ shprehet Isa.
Mulaku: Policia duhet të angazhohet më shumë në kapjen e zjarrvënësve të qëllimtë
Në mbledhje me drejtorët e drejtorive komunale kryetari i komunës nga Policia e Kosovës ka kërkuar angazhime të policisë në kapjen e qytetarëve, të cilët ndezin zjarre të qëllimta. “Dëmet nga zjarret e tilla janë të mëdha qofshin ato të natyrës ekonomike, të rrezikimit të jetës së qytetarëve, ambientit etj. Andaj policia duhet të angazhohet për të parandaluar ndezjen e zjarreve të tilla” porosit Mulaku. Sipas Shërbimit të Zjarrfikjes dhe Shpëtimit, dëmi material i shkaktuar vetëm nga zjarret e këtyre 5 ditëve arrin shifrën prej 11.300 € pa i përfshirë dëmet indirekte.
Zjarret e tilla të cilat konsiderohen të jenë të qëllimta shpeshherë po rriten duke rrezikuar të shkaktojnë dëme të mëdha ekonomike por edhe në vet jetën e njeriut. Zjarret gjithashtu po prishin ambientin.
.
