Drejtoria Komunale e Arsimit në Vushtrri organizoi sot mbledhjen e radhës me drejtorët e shkollave të komunës, me qëllim të diskutimit dhe koordinimit të përbashkët rreth tri çështjeve të rëndësishme për sistemin arsimor: Testi PISA, Testi i arritshmërisë dhe Garat e diturisë.
• Testi ndërkombëtar PISA – U diskutua përgatitja e shkollave pjesëmarrëse dhe rëndësia që ka ky test për vlerësimin e sistemit arsimor në nivel ndërkombëtar. U theksua nevoja për mobilizim institucional, mbështetje të stafit arsimor dhe krijimin e një klime të përshtatshme për realizimin me sukses të testimit.
• Testi i arritshmërisë – Drejtorët u informuan për ecurinë e përgatitjeve, afatet kohore dhe obligimet e institucioneve shkollore në këtë proces. U ritheksua rëndësia e zbatimit korrekt të udhëzimeve dhe ruajtja e integritetit të testit si një mjet për vlerësimin real të njohurive dhe kompetencave të nxënësve të klasës së nëntë.
• Garat komunale të diturisë – U prezantua plani për organizimin e garave në lëndët mësimore, me synim nxitjen e konkurrencës pozitive, evidentimin e nxënësve të talentuar dhe përkrahjen e tyre në rrugëtimin akademik. Drejtorët u inkurajuan të angazhohen në promovimin e pjesëmarrjes aktive të nxënësve dhe mësimdhënësve.
Drejtori i DKA-së Albanez Tahiraj, vlerësoi lart bashkëpunimin dhe përkushtimin e drejtorëve në përmbushjen e objektivave të përbashkëta, duke theksuar se vetëm përmes punës së koordinuar mund të arrihen rezultate të qëndrueshme dhe të prekshme në cilësinë e arsimit në Komunën e Vushtrrisë.
