Në kuadër të 28-vjetorit të Epopesë së Ushtrisë Çlirimtare të Kosovës, sot kryetari i Komunës së Vushtrrisë, Ferit Idrizi, bashkë me kabinetin qeveritar dhe përfaqësuesit e shoqatave të dala nga lufta e UÇK-së, kanë bërë homazhe në Kompleksin e Dëshmorëve të Kombit në Bletaj dhe në Kompleksin Memorial “Adem Jashari” në Prekaz.
Kryetari Idrizi tha se sakrifica e familjes Jashari dhe e të gjithë dëshmorëve të kombit mbetet themeli mbi të cilin qëndron liria jonë dhe frymëzimi për të ecur përpara me përgjegjësi ndaj vendit tonë.
“5, 6 dhe 7 marsi janë tri ditë që simbolizojnë sakrificën, qëndresën dhe rrugën tonë drejt lirisë. Sot, në nderim të dëshmorëve të kombit, bëmë homazhe në Kompleksin e Dëshmorëve të Kombit në Bletaj dhe vazhduam në Kompleksin Memorial “Adem Jashari” në Prekaz, ku përkujtuam Epopenë e Ushtrisë Çlirimtare të Kosovës dhe sakrificën e komandantit legjendar Adem Jashari, bashkë me familjen e tij heroike. Më pas, vizituam Bacën Rifat në kullën e Jasharajve, për t’i shprehur mirënjohjen dhe falenderimin tonë për kontributin e jashtëzakonshëm dhe sakrificën e familjes Jashari për lirinë e Kosovës. Lavdi e përjetshme dëshmorëve të kombit”, deklaroi kryetari Idrizi.
