Kryetari i komunës Bajram Mulaku të enjten në Vushtrri ka pritur ambasadorin e Mbretërisë së Bashkuar në Kosovë Ian Cliff, me të cilin kanë biseduar lidhur me zhvillimet në Vushtrri e në veçanti lidhur me investimet britanike në fabrikën e Llamarinës. Duke e njoftuar me një pasqyrë të zhvillimeve në Vushtrri, Mulaku ka thënë se investimet në Vushtrri do të ndikojnë në përmirësimin e gjendjes ekonomike. “Vushtrria është ndër komunat e rralla në Kosovë që ka përfituar investime nga Britania e Madhe, Vushtrria ka kapacitete dhe është në interes të qytetarëve që Britania e madhe të vazhdoj edhe me investime tjera këtu”, ka deklaruar Mulaku.
Ndërkaq ambasadori Cliff tha se Britania ka një interes edhe në komunën e Vushtrrisë. “Në fabrikën e Llamkos stell Britania ka bërë investimin më të madh në Kosovë, ku kompania britanike Core Group ka bërë investime në procesin e privatizimit të Llamkos-it”, ka thënë shefi i diplomacisë britanike në Prishtinë ambasadori Ian Cliff. Gjatë kësaj vizite ai është interesuar lidhur me ndikimin e këtyre investimeve në ekonominë vushtrriase.
Ambasadori Cliff po ashtu ka vlerësuar lartë edhe shkollën e policisë në Vushtrri, për të cilën tha se e ka vizituar edhe më heret sa kishte punuar në OSBE. “Shkolla për trajnimin e policisë e cila është në Vushtrri është interes jo vetëm për Britaninë por edhe për komunitetin ndërkombëtar në Kosovë”, ka thënë ai.
Britania ka interes në komunën e Vushtrrisë, tha ambasadori Cliff
