Dita tradicionale e patates të hënën është shënuar me një manifestim të mbajtur në kompaninë “Pestova” ku kanë marrë pjesë drejtues nga qeveria e Kosovës, pushteti lokal përfaqësues të institucioneve ndërkombëtare në Kosovë dhe fermerë të shumtë vushtrrias.
Kryetari i komunës së Vushtrrisë Bajram Mulaku, në hapje të këtij manifestimi tha se ndjehet i kënaqur që me punën e vyeshme të fermerëve vushtrrias por edhe me përkrahje të donatorëve, qeverisë së Kosovës por edhe asaj lokale, produktet nga prodhimtaria bujqësore dhe produktet e përpunimit të tyre të bëjnë emër dhe identitet jo vetëm tregun e Kosovës por edhe eksportohen jashtë vendit. Por duke theksuar vështirësitë që kishin kultivuesit e patates në dy vitet e fundit, Mulaku ka kërkuar mbështetje më të madhe nga institucionet qendrore për këtë nën sektor të bujqësisë.
Zëvendës kryeministrja e Qeverisë së Kosovës dhe njëherit ministrja e tregtisë dhe industrisë Mimoza Kusari Lila tha se që nga viti i kaluar fermerët por edhe përpunuesit e patates e në veçanti Pestova kanë arritur rezultate të larta në përpunimin e cilësisë. Duke u thirrur në vendimin e qeverisë së Kosovës që të gjitha institucionet dhe agjensionet që shpenzojnë paranë publike tu japin përparësi produkteve she shërbimeve të kompanive vendore, ajo ka folur për përkushtimin që ka qeveria e Kosovës të përkrah produktet dhe kompanitë vendore.
Ndërkaq krahas programeve të qeverisë për përkrahjen e bujqësisë, duke u bazuar në vështirësitë që kanë fermerët si me fatkeqësitë natyrore ashtu edhe me ndryshimet klimatike, ministri i bujqësisë Blerand Stavileci nga fshati Pestovë ka paralajmëruar projektin për sigurimin e prodhimtarisë bujqësore. Krahas kësaj ministri Stavileci u ka thënë fermerëve të patates në Vushtrris se fondi garantues për kredi bujqësore, do tu krjoj mundësi shumë më të mira kreditimi.
Krahas përkrahjes së idesë për sigurimin e prodhimtarisë bujqësore në Kosovë, pronari i kompanisë “Pestova”, Bedri Kosumi ka kërkuar nga institucionet bankare që të ulin normat e interesit për kreditë bujqësore e po ashtu që institucionet të heqin taksat doganore për lëndën e parë që përdoret në prodhimtari e që nuk ka mundësi të prodhohet në Kosovë.
Në manifestimin me rastin e ditës së patates kanë folur edhe Mark Wood nga programi NOA i USAIDit si dhe Artan Osmani nga Zyra e Bashkimit Evropian në Prishtinë.
Nga ky vit manifestimi Dita e patates me vendim të Kuvendit Komunal po mbahet nën patronazhin e Komunës së Vushtrrisë. Kryetari i komunës Bajram Mulaku ka ndarë mirënjohje për Bedri Kosumin.
Duke u bazuar në vështirësitë që kanë fermerët si me fatkeqësitë natyrore ashtu edhe me ndryshimet klimatike, ministri i bujqësisë Blerand Stavileci nga fshati Pestovë ka paralajmëruar projektin për sigurimin e prodhimtarisë bujqësore
