Paneliste të kësaj tryeze ishin deputete e Kuvendit të Kosovës: Flora Brovina, Teuta Sahatçiu, si dhe kryeshefja e Agjencisë për Barazi Gjinore- Edona Hajrullahu. Deputetja Sahatçiu ka folur për fuqizimin e rolit të gruas në asambletë komunale, duke rritur ndikimin e tyre dhe pjesëmarrjen në politikë “ Projekti i Grupit të Grave Deputete është që në zgjedhjet e ardhshme lokale të kemi gra që do të fitojnë garën për të qenë kryetare të komunave dhe këtë gjë mund ta arrijmë në saje të bashkëpunimit të niveleve të grave në komuna dhe qendër” tha Sahatçiu. Ajo gjatë fjalimit të saj ka insistuar në krijimin e rrjeteve dhe partneritetit në mes të anëtareve femra të kuvendeve komunale dhe deputeteve të kuvendit të komunës.
Deputetja Flora Brovina në këtë tryezë ka referuar për rëndësinë e përfshirjes së femrës në pozita vendimmarrëse. “Një shoqëri demokratike nuk funksionon pa pjesëmarrjen e gjysmës së popullsisë. Edhe pse ka përmirësime ne nuk mund të jemi të kënaqura në rezultatet” tha Brovina.
Ajo duke folur për ndryshimet pozitive të pozitës së gruas në jetën institucionale theksoi “Kemi dy gra zëvendëskryeministre dhe dy ministre dhe shumë gra tjera që përfaqësojnë jetën institucionale, porse çalojmë ca në rolin e saj në kuvend dhe organe tjera vendimmarrëse. Femra rolin e saj duhet ta fuqizoj në partitë politike për mos me qenë numër” tha Barovina.
Pas një debati të gjerë, në të cilin u inkuadruan shumica e përfaqësueseve prezente, gratë precizuan sfidat si dhe dhanë rekomandimet.
Programi i USAID-it, Inciativa për Komunat Demokratike dhe Efektive, ka organizuar tryezë me temën “Roli i Grave në Qeverisjen Lokale”. Tryeza ishte paraparë për të promovuar debatin për rolin e grave në qeverisje lokale dhe për të përmirësuar komunikimin në mes të grupeve të grave aktive në qeverisje lokale dhe grupeve aktive në nivel nacional. Grave pjesëmarrëse në tryezë nga 7 komunat e Kosovës, në fillim të tryezës mirëseardhje u ka dëshiruar Ginka Kapitanova- drejtoreshë e programit Inciativa për Komuna Demokratike dhe Efektive. “Gratë duhet të bashkohen për të arritur edhe më tepër sesa që është arritur gjer më tani dhe kjo tryezë ka këtë synim” tha ndër të tjera Kapitanova. Ajo gjithashtu ka njoftuar për sukseset në karrierën e saj. “Kam qenë kryetare e një komune në shtetin tim dhe kam pasur në fillim probleme për t’i bindur meshkujt që edhe një grua mund të jetë kryetare e suksesshme, një gjë të tillë e pres edhe në Kosovë” tha Kapitanova.
