Financimi i ndërtimit të objektit modern të Qendrës kryesore të mjekësisë familjare, ndërtimit të objektit të ri të komunës, infrastrukturës rrugore, mbështetjes së zhvillimit të bujqësisë dhe bizneseve prodhuese, janë disa nga projektet e realizuara, të financuara nga Komisioni Evropian apo mekanizmat tjerë të Evropës, për të cilat kryetari i komunës Bajram Mulaku ka falënderuar përfaqësuesin e posaçëm të Bashkimit Evropian Samuel Zhbogar gjatë vizitës që ai sot i bëri Komunës së Vushtrrisë. “Qytetarët e Komunës së Vushtrrisë i janë mirënjohës strukturave evropiane për investimet e mëdha të kryera në komunën tonë, të cilat kanë rritur cilësinë e jetës së qytetarëve dhe kanë ndikuar në zhvillim të vendit”, tha Mulaku.
Ai mysafirët e lartë evropian gjatë takimit i ka njoftuar për veçoritë e Komunës së Vushtrrisë duke u ndalur edhe në rolin e pakicave dhe integrimin e tyre në jetën institucionale. “Ka pasur vite që në komunën tonë nuk ka eksese ndërnacionale, gjersa pakica serbe po integrohet gradualisht në jetën institucionale” tha Mulaku. Zhbogar inkurajoi Mulakun në kultivim ë marrëdhënieve të mira në mes komuniteteve, gjersa lidhur me qëllimin themelor të vizitës tha “Jemi këtu që të punojmë bashkë me Komunën në realizim të projekteve investive nga BE-ja, të atyre projekteve që sjellin ndryshime pozitive të zhvillimit e punësimit” tha Zhbogar. Ai pos vizitës në Komunën e Vushtrrisë, ka vizituar objektin e Qendrës kryesore të mjekësisë familjare, gjersa para një numri nxënësish të gjimnazit “Eqrem Çabej”, ka mbajtur një ligjëratë për proceset evropiane.
“Qytetarët e Komunës së Vushtrrisë i janë mirënjohës strukturave evropiane për investimet e mëdha të kryera në komunën tonë, të cilat kanë rritur cilësinë e jetës së qytetarëve dhe kanë ndikuar në zhvillim të vendit”, tha Mulaku
