Pas dy vite pune me intensitet të lartë, kanë përfunduar hulumtimet për mundësinë e gjetjeve mortore të njerëzve në një lokacion në fshatin Zhilivodë të Vushtrrisë. Ekspertët e EULEX-it nga departamenti për mjekësi ligjore, nuk kanë gjetë mbetje mortore në këtë lokacion, hulumtimi i së cilës është bërë me urdhër të Gjykatës. Të enjten edhe zyrtarisht kanë përfunduar hulumtimet dhe gërmimet e mëtejme.
Me rastin e përfundimit të hulumtimeve në Zhilivodë, ushtruesi i detyrës së bashkëkryesuesit të Departamentit të mjekësisë ligjore Krasimir Nikolov, tha se në atë lokacion është gërmuar gjatë 24 javëve në vitit 2011-2012, pasi që për shkak të karakteristikave të lokacionit është dashur të hulumtohet e tërë zona. “Aty nuk gjetëm mbetje mortore të njerëzve”, tha Nikolov. Ndërkaq Prenk Gjetaj nga komisioni qeveritar për të pagjeturit, tha se po mbyllet një projekt i madh i filluar para tre viteve. “Në emër të Qeverisë së Kosovës falënderoj për punët e kryera FSK-në, Departamentin e mjekësisë ligjore dhe posaçërisht ambasadën e mbretërisë së Belgjikës, e cila ka mbështetur financiarisht në tërësi këtë projekt”, ka thënë . Ai ka folur edhe për vështirësitë e realizimit të këtij projekti duke u ndalur në politizimin e panevojshëm të shkaktimit të një zjarri kohët e fundit në atë lokacion. “Ka qenë projekti më transparent i zhvilluar”, ka thënë Gjetaj. Ndërkaq eksperti i mjekësisë ligjore Arsim Gërxhaliu tha se hulumtimet në atë lokacion kanë filluar mbi dyshimet që janë ngritur nga disa qytetarë se atje mund të ishin 25 mbetje mortore.
“Aty nuk gjetëm mbetje mortore të njerëzve”, tha Krasimir Nikolov bashkëkryesues i Departamentit të mjekësisë ligjore në EULEX
