Komuna dhe USAID-i ka vite që kanë bashkëpunim shumë të mirë në shumë fusha, qoftë asaj të ngritjes së performancës së shërbimeve komunale, inkasimit më të mirë të të hyrave vetanake, evidentim e qartësim të pronës komunale, përgatitje të Kornizës Afatmesme Buxhetore dhe shumë fusha tjera, në të cilat ekspertët e USAID-it, programi DEMI bashkëpunojnë dhe organizojnë shumë punëtori të këtyre natyrave. USAID-i, Komunën e Vushtrrisë e ndihmon edhe në asistencë teknike.
Krahas këtij bashkëpunimi, këta dy partnerë janë duke punuar me të madhe edhe në krijim dhe ruajtje të ambientit duke investuar në ngritje të shëtitoreve, shesheve gjelbëruese, fusha sporti etj. Sipas Ymer Cecelisë-zyrtar komunal në Drejtorinë e Shërbimeve Publike, projekti i përbashkët USAID-komuna, për shtim të sipërfaqeve të gjelbra tek shëtitorja përgjatë brigjeve të lumit “Silnica” është në përfundim dhe se ka pasur koston prej 8.832€. “Krahas këtij projekti që është në përfundim, po kryhet edhe projekti tjetër nga partnerët duke rregulluar e gjelbëruar në tërësi hapësirën përreth palestrës sportive” thotë Cecelia. Sipas tij në këtë projekt të rregullimit të hapësirës gjelbëruese është ndërtuar edhe staza e vrapimit, ku kostoja financiare e këtij projekti është 23.063€. Në partneritet me USAID-in gjithashtu komuna po realizon projektin e shtimit të sipërfaqeve gjelbëruese në rrugën e qytetit “Lidhja e Lezhës” në kosto financiare prej 20.395€. USAID-i po ashtu ka investuar bashkë me komunën në ndërtim të shëtitores në njërin nga brigjet e lumit “Silnica” në gjatësi prej 1.100 metrave duke ndarë 56.142€. Vitin e kaluar USAID-i gjithashtu ka përfunduar punimet në restaurimin dhe gjelbërimin e parkut të qytetit, gjersa Komuna e Vushtrrisë dy vite radhazi nga fondi i saj ndanë afërsisht nga 30 mijë euro për ambient, përkatësisht mirëmbajtje të gjelbërimit. Populli amerikan përmes mekanizmave të tyre institucional gjithashtu është duke investuar rreth 500 mijë dollarë në hulumtim, restaurim dhe konservim të kalasë së qytetit, gjersa në realizim e sipër është projekti për rregullim të fushave të sportit dhe oborreve të shkollave fillore në fshatin Bukosh dhe Smrekonicë në kosto financiare prej 63.957€.
Në këtë projekt të rregullimit të hapësirës gjelbëruese është ndërtuar edhe staza e vrapimit, ku kostoja financiare e këtij projekti është 23.063 €
