Vendlindja e Hasan Prishtinës kremton përvjetorin e lirisë

Gjatë këtyre 4 viteve u asfaltuan rrugë me gjatësi prej afro 187 kilometra, u kubëzuan rrugët në gjatësi prej 22 kilometra. Përgjithësisht u realizuan 600 projekte të investimeve kapitale me kosto financiare mbi 45 milion euro ” përfundoi Mulaku. Ish gjenerali i ushtrisë shqiptare Kudusi Lama tha se ndjehej i lumtur me mundësinë e dhënë që t’iu drejtohet sot qytetarëve të vendlindjes së Hasan Prishtinës në përvjetorin e lirisë. “ Do të dëshiroja në këtë moment të isha në çdo familje dëshmori, të kisha pranë çdo luftëtar të asaj ushtrie, Ushtrisë Çlirimtare të Kosovës, që na dha lirinë, do të dëshiroja të përkdhelë të gjitha lulet dhe drurët e tokave shqiptare, për të provuar freskinë e ajrit të maleve dhe fushave, duke shikuar fytyrat e fëmijëve të lumtur, pleqëve të qetë, burrave e grave dinamike për të ndërtuar Kosovën e lirë, duke dhënë mesazhin se tokat shqiptare në të gjithë shtrirjen e tyre do të jenë të lira e shqiptarët do të jenë të fortë e të lumtur ” tha Lama. Ai duke folur për të ardhmen e kombit shqiptar theksoi: “ Fati i shqiptarëve përfundimisht është vendosur. As që duhet të dyshojë dikush. Shqiptarët do të jenë zot të historisë së tyre, dhe nuk do të ketë më prapaskena në kurriz të tyre ” tha ish gjenerali Lama. Kryetari i shoqatës së familjeve të dëshmorëve Xhafer Istrefi ka përkujtuar luftën heroike që bënë pjesëtarët e UÇK-së për lirinë e vendit. “ Fillimin e ri të jetës e mundësoi lufta e shenjtë e UÇK-së dhe gjaku i derdhur për liri. Neve që mbetëm gjallë për të përjetuar kremtet e ditës së çlirimit na mbetet për obligim moral në sendërtimin e ruajtjen e idealit të të gjithë atyre që dhanë jetën për këtë ditë ” tha Istrefi.
Në këtë manifestim, drejtuesit e pushtetit lokal ndanë dhjetëra plaketa e mirënjohje për qytetarët e merituar të së kaluarës dhe së tashmes. Njëra nga ato që pranuan mirënjohje ish veprimtarja e viteve 81’, ish e burgosura Afërdita Dervishi ndau këtë mendim. “ Ata që mësohen të respektojnë dhe vlerësojnë të tjerët, në rradhë të parë kanë respektuar dhe nderuar vetveten ” tha Dervishi. Për nder të kësaj kremteje ansambli i qendrës së kulturës “Hasan Prishtina” shfaqi një program të pasur kulturo-artistik.