Ceremonia festive vazhdoi me manifestimin kryesor të mbajtur në qendrën e kulturës Hasan Prishtina. Kryetari i komunës Bajram Mulaku ka uruar qytetarët për këtë festë. “ Shqiptarët kujtojnë me pietet 28 Nëntorin e vitit 1443, atëherë kur në Krujë Skenderbeu ngriti flamurin shqiptar në luftë kundër Perandorisë Osmane. Me 1912 pra sot e 99 vite më parë u ngrit prapë flamuri shqiptar në Vlorë nga Ismail Qemajli për të shpallur pavarësinë e shtetit shqiptar në Ballkan ” tha kryetari Mulaku. Ai edhe në këtë takim manifestim përkujtoi kontributin e patriotit të madh vushtrrias Hasan Prishtinës. “ Në këtë përvjetor s’ka se si mos ta kujtojmë të madhin Hasan Prishtina, i cili ishte ideatori politik dhe kreatori ushtarak i pavarësisë së tokave të shpallura shqiptare ” tha kryetari i komunës Bajram Mulaku. Idriz Asllani në këtë manifestim ka folur në emër të tri shoqatave të dala nga lufta e UÇK-së. “ 28 Nëntori i vitit 1912, ai i vitit 1956, që shënon datëlindjen e komandantit legjendar Adem Jashari dhe 28 Nëntorin e vitit 1997, kur UÇK-ja del publikisht në skenë, janë data të cilat populli do t’i kujtojë përherë me krenari, ngase kujtojmë luftën e lavdishme të UÇK-së në krye me komandantin legjendar si dhe kujtojmë me krenari e respekt të gjithë dëshmorët dhe të rënët tjerë të kësaj lufte, por edhe të luftërave të mëhershme për lirinë kombëtare” tha Asllani. Në vazhdim, ansambli i qytetit “Hasan Prishtina” ka shfaqur një program artistik me një recital të shkëlqyer si dhe pika shumë të zgjedhura muzikore që kanë kënaqur publikun. Vushtrria sot ishte e tëra e veshur me petkun festiv për të kremtuar 28 Nëntorin, ditën që simbolizon ditën e flamurit, ditën e pavarësisë së Shqipërisë si dhe datëlindjen e komandantit legjendar Adem Jasharit. Flamuj kombëtarë kishin mbushur qytetin, ndërkaq edhe qytetarët e shumtë kishin vendosur flamujt në shtëpitë e tyre. Krerët e pushtetit lokal bashkë me atë të shoqatave të dala nga lufta e fundit nga mëngjesi kishin filluar me aktivitetet institucionale duke vizituar dhe vendosur kurorat në varrezat e Jasharajve në Prekazin legjendar, pastaj në kompleksin memorial të dëshmorëve, varrezat e dëshmorëve në Bletajë si dhe tek shtatorja e komandantit Adem Jashari në Vushtrri.
